ಸುಮಾರು ನೂರು ವರ್ಷಗಳ ಹಿಂದೆ ನಡೆದ ತುಳುವ ಏಕೀಕರಣ ಮತ್ತು ಭಾಷಾ ಚಳುವಳಿಯ ಅಂಗವಾಗಿ ಅಸ್ತಿತ್ವಕ್ಕೆ ಬಂದ ತುಳುವ ಸಾಹಿತ್ಯ ಮಾಲೆಯಲ್ಲಿ ಎಸ್.ಯು.ಪಣಿಯಾಡಿಯವರ ಮುತಾಲಿಕೆಯಲ್ಲಿ ಪ್ರಕಟವಾದ ಹನ್ನೊಂದು ತುಳು ಕೃತಿಗಳ ಪೈಕಿ ಸ್ವಾತಂತ್ರ್ಯ ಹೋರಾಟಗಾರ, ಗಾಂಧೀವಾದಿ ಪೊಳಲಿ ಶೀನಪ್ಪ ಹೆಗ್ಡೆಯವರು ಬರೆದಿರುವ ” ಮಿತ್ಯನಾರಾಯಣ ಕತೆ” ಒಂದು. ಇದನ್ನು ” Tale of Narayana : The Impostor” ಎಂದು ಬಿ. ಸುರೇಂದ್ರ ರಾವ್ ಮತ್ತು ನಾನು ಇಂಗ್ಲೀಷ್ ಗೆ ಅನುವಾದಿಸಿದ್ದೇವೆ. ಇದನ್ನು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪ್ರಕಟಿಸಿದೆ. ಆದರೆ ಬಿಡುಗಡೆಯ ಭಾಗ್ಯ ಹೊಂದಿಲ್ಲ!
ವಾಸ್ತವವಾದೀ ಸಾಮಾಜಿಕ ಕಾದಂಬರಿಗಳಿಗಿಂತ ಮೊದಲು ರಮ್ಯ, ಫ್ಯಾಂಟಸಿ ಗದ್ಯ ಕಥನಗಳು ಕನ್ನಡವೂ ಸೇರಿದಂತೆ ಭಾರತೀಯ ಭಾಷೆಗಳಲ್ಲಿ ರಚನೆಯಾದಂತೆ ತುಳುವಿನಲ್ಲಿಯೂ ಆಗಿದೆ. ಲೇಖಕರು ಇದನ್ನು ಕಾದಂಬರಿ ಎಂದು ಕರೆಯದೆ ಕತೆ ಎಂದೇ ಹೇಳಿದ್ದಾರೆ. ಇದು ಯಾಕೆ ಕಾದಂಬರಿಯ ಸ್ವರೂಪವನ್ನು ಪಡೆದಿಲ್ಲ ಎಂಬುದನ್ನು ಬಿಳಿಮಲೆಯವರು ಚರ್ಚಿಸಿದ್ದಾರೆ. ಈ ಕತೆಗೆ ಎರಡು ಆಯಾಮಗಳಿವೆ. ಒಂದು, ಕಾಲ್ಪನಿಕ ಕತೆಯ ಹಂದರ. ಎರಡು, ಪೊಳಲಿ ಪರಿಸರದ ದಟ್ಟ ಸಾಂಸ್ಕೃತಿಕ ವಿವರಗಳು. ಸುಳ್ಳು ಮೋಸ ವಂಚನೆಗಳು ಅಂತಿಮವಾಗಿ ಶಿಕ್ಷಾರ್ಹ ಅಪರಾಧ ಎನ್ನುವುದನ್ನು ಈ ಕೃತಿ ಸಾರುತ್ತದೆ. ಒಬ್ಬ ಭಟ್ಟ ಜೈನ ಹುಡುಗಿಯನ್ನು ಪ್ರೇಮಿಸಿ ಮದುವೆಯಾಗಲು ಪಟ್ಟ ಸಾಹಸಗಳು ಮತ್ತು ಸ್ಥಳೀಯ ಜಾತ್ರೆ ಮತ್ತು ಜನಜೀವನದ ವಿವರಗಳು ಈ ಕೃತಿಯ ಸಾರವತ್ತಾದ ಭಾಗಗಳು. ತುಳು ಸಾಂಸ್ಕೃತಿಕ ವಿಶ್ವಕೋಶದಂತಿರುವ ಈ ಕೃತಿಯನ್ನು ತುಳುವರು ಓದಬೇಕು. ತುಳುವೇತರ ಓದುಗರಿಗಾಗಿ ನಮ್ಮ ಅನುವಾದ. ಇಂಗ್ಲೀಷ್ ಆವೃತ್ತಿಯಲ್ಲಿ ಪ್ರೊ. ವಿವೇಕ ರೈಯವರ ಮುನ್ನುಡಿ ಮತ್ತು ಅನುವಾದಕರ ಕೃತಿವಿಶ್ಲೇಷಣೆಯ ಒಟ್ಟು ಸುಮಾರು ಇಪ್ಪತ್ತು ಪುಟಗಳ ಪ್ರಸ್ತಾವನೆ ಇದೆ. ” …Story with wings…flying into the realm of the fable..”.
