ಗೂಗಲ್ ನಲ್ಲಿ ಯಾವುದೇ ಕಾರಣಕ್ಕೂ ಕಸ್ಟಮರ್ ಕೇರ್ ಸಂಖ್ಯೆಯನ್ನು ಸರ್ಚ್ ಮಾಡಿದರೆ ನೀವು ಏಮಾರುವುದಂತೂ ಸತ್ಯ!

ಹೈದರಾಬಾದ್​: ಆಧುನಿಕ ಯುಗದಲ್ಲಿ ತಾಂತ್ರಿಕತೆ ಎಷ್ಟೊಂದು ಮುಂದುವರಿದಿದೆ ಎಂದರೆ ಜನರು ತಮ್ಮ ಯಾವುದೇ ಪ್ರಶ್ನೆಗೆ, ಸಮಸ್ಯೆಗೆ ಉತ್ತರ ಕಂಡಕೊಳ್ಳಲು ಮೊದಲು ಗೂಗಲ್​​ ಸರ್ಚ್​ ಮಾಡುತ್ತಾರೆ. ಈ ಮೂಲಕ ಜನರು ಪ್ರತಿಯೊಂದಕ್ಕೂ ಅಂತರ್ಜಾಲಕ್ಕೆ ಅಂಟಿಕೊಂಡು ಅಂಗೈನಲ್ಲಿ ಇಡೀ ಜಗತ್ತು ನೋಡುತ್ತಾರೆ. ಆದರೆ, ಈ ಅಂತರ್ಜಾಲವು ಎಷ್ಟು ಉಪಕಾರಿಯೋ? ಸ್ವಲ್ಪ ಯಾಮಾರಿದರೂ ಅಷ್ಟೇ ಅಪಾಯಕಾರಿ ಎಂಬುದಂತೂ ಸತ್ಯ. 

ಇಂದು ಎಲ್ಲೆಡೆ ವಂಚಕರ ಜಾಲ ಕಂಡು ಬರುತ್ತಿದ್ದು, ಸ್ವಲ್ಪ ಯಾಮಾರಿದರೂ ಈ ಜಾಲಕ್ಕೆ ಸುಲಭವಾಗಿ ತುತ್ತಾಗುತ್ತೇವೆ. ಹೀಗಾಗಿ ಗೂಗಲ್​ ಸರ್ಚ್​ ಮಾಡುವಾಗ ಎರೆಡೆರಡು ಬಾರಿ ಆಲೋಚನೆ ‌ಮಾಡುವುದು ಒಳಿತು. ಯಾರೂ ಕೂಡ ಏನೇ ಆದರೂ ಗೂಗಲ್​ನಲ್ಲಿ ಯಾವುದೇ ಕಾರಣಕ್ಕೂ ಕಸ್ಟಮರ್​ ಕೇರ್​ ನಂಬರ್​ ಹುಡುಕಬೇಡಿ. ಏಕೆಂದರೆ ಕಸ್ಟಮರ್​ ಕೇರ್​ ನಂಬರ್​ ಹುಡುಕಲು ಮುಂದಾಗಿದ್ದೇವೆ ಎಂದರೆ ಸೈಬರ್​ ವಂಚಕರ ಬಲೆಗೆ ಬೀಳುವ ಸಾಧ್ಯತೆ ಹೆಚ್ಚಿದೆ ಎಂದರ್ಥ. ಕಸ್ಟಮರ್​ ಕೇರ್​ ನಂಬರ್ ಹುಡುಕಾಟ ನಡೆಸಲು ಹೋಗಿ ವಂಚಕರ ಜಾಲಕ್ಕೆ ಸಿಲುಕಿರುವ 1,395 ಪ್ರಕರಣಗಳು ಹೈದರಾಬಾದ್​ನಲ್ಲಿ ನಡೆದಿವೆ. ಇದರಲ್ಲಿ 189 ಪ್ರಕರಣಗಳಲ್ಲಿ ಸಂತ್ರಸ್ತರು 1.01 ಕೋಟಿ ರೂ‌. ನಗದು ಕಳೆದುಕೊಂಡಿದ್ದಾರೆ. 

ಬ್ಯಾಂಕ್​, ಟೆಲಿಕಾಂ ಕಂಪೆನಿಗಳು, ಫುಡ್​ ಡೆಲಿವರಿ ಆ್ಯಪ್ಸ್​, ಟ್ರ್ಯಾವೆಲ್ಸ್​, ಕೊರಿಯರ್​, ಗೂಗಲರ್​ ಪೇ, ಫೋನ್​ ಪೇ, ಪೇಟಿಎಂ ಸೇರಿದಂತೆ ಹಲವಾರು ಸಂಸ್ಥೆಗಳ ಕಸ್ಟಮರ್​ ಕೇರ್​ ನಂಬರ್​ ಗೂಗಲ್ ನಲ್ಲಿ ಹುಡುಕಾಟ ನಡೆಸಲು ಹೋಗಿ ಅನೇಕರು ವಂಚಕರ ಜಾಲಕ್ಕೆ ಸಿಲುಕಿ ಹಣ ಕಳೆದುಕೊಂಡಿದ್ದಾರೆ. ಇದಲ್ಲದೆ ಸೈಬರ್​ ಕಳ್ಳರು ಗೂಗಲ್​ ಆ್ಯಡ್ಸ್​ ಮೂಲಕ ನಕಲಿ ಮಾಹಿತಿಯನ್ನು ಅಪ್ಲೋಡ್ ಮಾಡಿ ವಂಚನೆ ಮಾಡಲು ಕಾಯುತ್ತಿರುತ್ತಾರೆ. ಯಾರಾದರೂ ಯಾವುದಾದರೂ ಸಂಸ್ಥೆಯ ಕಸ್ಟಮರ್​ ಕೇರ್​ ನಂಬರ್​ ಸರ್ಚ್​ ಮಾಡಿದಾಗ ತಮ್ಮ ನಂಬರ್​ ಮೊದಲು ಬರುವಂತೆ ಸೈಬರ್​ ವಂಚಕರು ಗೂಗಲ್​ ಸರ್ಚ್​ ಇಂಜಿನ್​ನಲ್ಲಿ ಸೆಟ್​ ಮಾಡಿರುತ್ತಾರೆ. ಆದ್ದರಿಂದ ಆನ್​ಲೈನ್​ ಮೂಲಕ ಕಸ್ಟಮರ್​ ಕೇರ್​ ಸಂಖ್ಯೆ​ ಹುಡುಕಾಟ ಮಾಡುವ ಗ್ರಾಹಕರು ಸ್ವಲ್ಪ ಎಚ್ಚರ ವಹಿಸುವುದು ಸೂಕ್ತ. ಇಲ್ಲವಾದಲ್ಲಿ ವಂಚಕರ ಜಾಲಕ್ಕೆ ಸಿಲುಕಿ ಹಣ ಕಳೆದುಕೊಳ್ಳುವುದಂತೂ ಖಂಡಿತಾ. 

ಒಂದು ವೇಳೆ ಕಸ್ಟಮರ್​ ಕೇರ್​ನವರು ನಿಮ್ಮ ಬ್ಯಾಂಕ್​ ಮಾಹಿತಿ, ಎಟಿಎಂ ಪಿನ್​, ಒಟಿಪಿ ಸಂಖ್ಯೆ ಸೇರಿದಂತೆ ಇನ್ನಿತರ ಗೌಪ್ಯ ಮಾಹಿತಿ ಕೇಳಿದ್ದಲ್ಲಿ ತಕ್ಷಣ ಸ್ಥಳೀಯ ಪೊಲೀಸ್​ ಠಾಣೆಯ ಗಮನಕ್ಕೆ ತರಬೇಕು. ಏಕೆಂದರೆ ಯಾವುದೇ ಬ್ಯಾಂಕ್​ಗಳು ಅಥವಾ ಸಂಸ್ಥೆಗಳು ನಿಮ್ಮ ಬ್ಯಾಂಕ್​ ಮಾಹಿತಿಯನ್ನಾಗಲಿ ಅಥವಾ ಎಟಿಎಂ ನಂಬರ್​ ಆಗಲಿ ಕೇಳುವುದಿಲ್ಲ. ಆದ್ದರಿಂದ ವಂಚನೆಯಿಂದ ಪಾರಾಗಲು ಮೈಯೆಲ್ಲಾ ಎಚ್ಚರದಿಂದ ವ್ಯವಹರಿಸುವುದು ಒಳಿತು.