ಪತಿಯ ಲ್ಯಾಪ್ ಟಾಪ್ ಬಳಸಿ ಮಾಡಬಾರದ ಕೃತ್ಯ ಎಸಗಿದ ಮಹಿಳೆಯ ಬಂಧನ!

ತುಮಕೂರು: ಪತಿಯ ಲ್ಯಾಪ್​ಟಾಪ್​ ಬಳಸಿಕೊಂಡು ದುಡ್ಡು ಕೊಟ್ರೆ ಸ್ಪಾಟಲ್ಲೇ ಕೆಲಸ ಎಂದು ದಾಖಲೆಗಳನ್ನು ತಿರುಚಿ, ಆರ್​ಟಿಒ ಇಲಾಖೆಗೆ ವಂಚನೆಗೈಯುತ್ತಿದ್ದ ಖತರ್ನಾಕ್​ ಮಹಿಳೆಯನ್ನು ಪೊಲೀಸರು ಬಂಧಿಸಿ, ಕಂಬಿ ಹಿಂದೆ ತಳ್ಳಿದ್ದಾರೆ.

ಸಿಂಧೂರ ಲಕ್ಷ್ಮೀ ಬಂಧಿತ ಆರೋಪಿತೆ. ಈಕೆಯ ಕೃತ್ಯ ಕಂಡು ಪೊಲೀಸರೇ ದಂಗಾಗಿದ್ದಾರೆ. 

ಮಧುಗಿರಿ ಆರ್​ಟಿಒ ಕಚೇರಿಯ ರಿಜಿಸ್ಟ್ರೇಶನ್ ಪಾಸ್​ವರ್ಡ್ ಹೊಂದಿರುವ ಈಕೆ ಬೇಕೆಂದಲ್ಲಿ ವಾಹನಗಳನ್ನು ರಿಜಿಸ್ಟ್ರೇಷನ್ ಮಾಡಿಕೊಟ್ಟಿದ್ದಾಳೆ. ಈ ಮೂಲಕ ಸಿಂಧೂರ ಲಕ್ಷ್ಮಿ 2019 ರಿಂದ 2020 ರವರೆಗೂ ಲಕ್ಷಾಂತರ ರೂ. ವನ್ನು ವಂಚಿಸಿದ್ದಾಳೆ.

ಹಣ ಕೊಟ್ಟರೆ ಸ್ಥಳದಲ್ಲೇ ಆರ್​ಸಿ ಕಾರ್ಡ್, ಚಾರ್ಸಿ ನಂಬರ್ ಮತ್ತು ಎಫ್​ಸಿ ಸರ್ಟಿಫಿಕೇಟ್ ಕೊಡುತ್ತಿದ್ದಳು. ಈ ಕೃತ್ಯಕ್ಕೆ ಆಕೆ ತನ್ನ ಪತಿಯ ಲ್ಯಾಪ್​ಟಾಪ್​ ಅನ್ನು ಬಳಸಿಕೊಂಡಿದ್ದಾಳೆ. ಆದ್ದರಿಂದ ಬೇಕೆಂದಾಗ ಲಾಗಿನ್ ಆಗಿ ಹಣ ನೀಡಿದವರಿಗೆ ವಾಹನ ರಿಜಿಸ್ಟ್ರೇಷನ್ ಮಾಡಿಕೊಡುತ್ತಿದ್ದಳು. 

ಈ ಚಾಲಾಕಿ ಮಹಿಳೆ ಒಂದಲ್ಲ ಎರಡಲ್ಲ ಬರೋಬ್ಬರಿ 286 ದಾಖಲೆಗಳನ್ನು ತಿದ್ದಿ ಹಣವನ್ನು ನುಂಗಿ ನೀರು ಕುಡಿದಿದ್ದಾಳೆ. ಈ ಸಂಬಂಧ ತುಮಕೂರು ಸೈಬರ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಈ ಬಗ್ಗೆ ತನಿಖೆ ನಡೆಸಿರುವ ಪೊಲೀಸರು ಈ ಖತರ್ನಾಕ್​ ಕಳ್ಳಿಯನ್ನು ಬಂಧಿಸಿದ್ದಾರೆ.

ಇದೀಗ ಆಕೆ ಬಳಿಯಿರುವ ಲ್ಯಾಪ್​ಟ್ಯಾಪ್ ಹಾಗೂ ಅಕ್ರಮ ದಾಖಲೆಗಳನ್ನು ವಶಕ್ಕೆ ಪಡೆದುಕೊಂಡಿದ್ದು, ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.