ಝೂಮ್ ಕಾಲ್ ನಲ್ಲಿಯೇ 900 ಉದ್ಯೋಗಿಗಳನ್ನು ನೌಕರಿಯಿಂದ ತೆಗೆದ ಸಿಇಒ: ವೀಡಿಯೋ ವೈರಲ್‌

ನವದೆಹಲಿ/ನ್ಯೂಯಾರ್ಕ್​: ಕೋವಿಡ್ ಸೋಂಕು ಜಗತ್ತಿಗೆ ಕಾಲಿಟ್ಟ ಬಳಿಕ ಎಲ್ಲ ವ್ಯವಹಾರಗಳೂ ಆನ್ಲೈನ್ ಹಾಗೂ ಜೂಮ್​ ಕಾಲ್​ನಲ್ಲೇ ನಡೆಯುತ್ತಿದೆ. ಇದೀಗ ಕಂಪೆನಿಯೊಂದರ ಸಿಇಒ ಜೂಮ್​​ ಕಾಲ್​ನಲ್ಲೇ ತಮ್ಮ 900 ಮಂದಿ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿರುವ ವೀಡಿಯೋವೊಂದು ಭಾರೀ ವೈರಲ್​ ಆಗುತ್ತಿದೆ.

ಈ ವೀಡಿಯೋವನ್ನು ನೋಡಿದ ನೆಟ್ಟಿಗರು ವರ್ಷಾಂತ್ಯದ ಹಾಗಯ ಕ್ರಿಸ್​ಮಸ್​ನ ಹಾಲಿಡೇ ಮೂಡ್​ನಲ್ಲಿದ್ದ ಉದ್ಯೋಗಿಗಳಿಗೆ ಎಂಥಹ ಬಿಗ್ ಶಾಕ್​ ಕೊಟ್ಟಿದ್ದಾರೆ ಎಂದು ವಿವಿಧ ರೀತಿಯ ಕಾಮೆಂಟ್​ಗಳನ್ನು ನೀಡಿದ್ದಾರೆ. ಅಮೆರಿಕದ ಡಿಜಿಟಲ್​ ಸರ್ವೀಸಸ್​ ಕಂಪೆನಿ ಬೆಟರ್​.ಕಾಮ್​​ಸಂಸ್ಥೆಯ ಸಿಇಒ ವಿಶಾಲ್​ ಗಾರ್ಗ್​ ಅವರೇ ಜೂಮ್ ಕಾಲ್ ನಲ್ಲಿಯೇ 900 ಕೆಲಸಗಾರರನ್ನು ನೌಕರಿಯಿಂದ ಕಿತ್ತು ಹಾಕಿದವರು.

"ಅಮೆರಿಕದಲ್ಲಿ ಹಾಗೂ ಭಾರತದಲ್ಲಿ ಉದ್ಯೋಗ ಮಾಡುತ್ತಿರುವ ನಮ್ಮ 900 ನೌಕರರನ್ನು ನಾವು ತಕ್ಷಣದಿಂದಲೇ ಲೇ ಆಫ್ ಮಾಡಬೇಕಾಗಿದೆ. ಈ ಜೂಮ್​ ಕಾಲನ್ನು ಅಟೆಂಡ್​ ಮಾಡುತ್ತಿರೋ ಎಲ್ಲಾ ನೌಕರರೂ ಕೆಲಸ ಕಳೆದುಕೊಳ್ಳುತ್ತಿರುವ ನತದೃಷ್ಟ ಗುಂಪಿಗೆ ಸೇರಿದ್ದಾರೆ" ಎಂದು ಸಿಇಒ ವಿಶಾಲ್ ಗಾರ್ಗ್ ಘೋಷಿಸಿದ್ದಾರೆ. 

ಲ್ಯಾಪ್​ಟಾಪ್ ನ ಸ್ಕ್ರೀನ್​ ಮೇಲೆ ಸಿಇಒ ಈ ಶಾಕಿಂಗ್​ ನ್ಯೂಸ್​ ಕೊಡುತ್ತಿರುವುದನ್ನು ಕೆಲಸದಿಂದ ತೆಗೆಯಲ್ಪಟ್ಟ ಉದ್ಯೋಗಿಯೊಬ್ಬರು ರೆಕಾರ್ಡ್​ ಮಾಡಿದ್ದಾರೆ. ಈ ವಿಡಿಯೋವನ್ನು ಡಿ.4 ರಂದು ಉದ್ಯೋಗಿಯೊಬ್ಬರು ಪವರ್​ ಆಫ್ ಬನಾನಾ ಎಂಬ ತಮ್ಮ ಯೂಟ್ಯೂಬ್​ ಚಾನೆಲ್​ನಲ್ಲಿ ಪೋಸ್ಟ್​ ಮಾಡಿದ್ದಾರೆ. ಈಗಾಗಲೇ ಸುಮಾರು 50 ಸಾವಿರ ಮಂದಿಯಿಂದ ವೀಕ್ಷಣೆಗೊಂಡಿರುವ ಈ ವಿಡಿಯೋಗೆ ನೂರಾರು ಮಂದಿ ನೆಟ್ಟಿಗರು ಪ್ರತಿಕ್ರಿಯಿಸಿದ್ದಾರೆ. 

"ಮಾರ್ಕೆಟ್​ನ ಕೆಟ್ಟ ಸ್ಥಿತಿಯ ಪರಿಣಾಮ ನಿಮ್ಮನ್ನು ಲೇ ಆಫ್​ ಮಾಡಲಾಗುತ್ತಿದೆ. ಈ ಕುರಿತಾಗಿ ನಮ್ಮ ಎಚ್​​.ಆರ್​. ಇಲಾಖೆಯಿಂದ ಸದ್ಯದಲ್ಲೇ ನಿಮಗೆ ಈ-ಮೇಲ್​ ಬರಲಿದೆ. ಕೆಲಸದಿಂದ ತೆಗೆಯುತ್ತಿರುವ ಎಲ್ಲರಿಗೂ 4 ವಾರಗಳ ಸೆವೆರೆನ್ಸ್​ ಭತ್ತೆ ಹಾಗೂ 1 ತಿಂಗಳ ಪೂರ್ಣ ಬೆನೆಫಿಟ್ಸ್​ ನೀಡಲಾಗುವುದು" ಎಂದು ಸಿಇಒ ಗಾರ್ಗ್​ ಹೇಳಿದ್ದಾರೆ. ಗಾರ್ಗ್​​ ಇದನ್ನು ಅನೌನ್ಸ್​ ಮಾಡುತ್ತಿರುವಂತೆಯೇ ವಿಡಿಯೋ ರೆಕಾರ್ಡ್​ ಮಾಡುತ್ತಿದ್ದ ಉದ್ಯೋಗಿಯು ಬೇಸರದ ಉದ್ಗಾರ ತೆಗೆಯುವುದೂ ಹಿನ್ನೆಲೆಯಲ್ಲಿ ಕೇಳಿಬರುತ್ತದೆ.