ನಾದಿನಿ ಮೇಲೆ ಕಣ್ಣು ಹಾಕಿದ ಕಾಮುಕ ಭಾವ ಆಕೆಯನ್ನು ಅಪಹರಿಸಿ ಕಂಬಿ ಹಿಂದೆ ಸೆರೆಯಾದ!

ಬೆಂಗಳೂರು: ಪತ್ನಿಯ ತಂಗಿಯ ಮೇಲೆಯೇ ಕಣ್ಣು ಹಾಕಿದ ಭಾವನೋರ್ವನು ನಾದಿನಿಯನ್ನು ಮದುವೆಯಾಗುವಂತೆ ಒತ್ತಾಯಿಸಿದ್ದಲ್ಲದೇ ಆಕೆಯನ್ನು ಅಪಹರಿಸಿದ್ದಾನೆ. ಇದೀಗ​ ಕಾಮುಕ ಭಾವ ಸೇರಿದಂತೆ ಮೂವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

ಪ್ರಮುಖ ಆರೋಪಿ ದೇವರಾಜ್​ ಹಾಗೂ ಆತನ  ಸಹಚರ ನವೀನ್​ಕುಮಾರ್​ ಸೇರಿದಂತೆ ಮತ್ತೋರ್ವನು ಬಂಧಿತರು.

ಕೊಡಿಗೆಹಳ್ಳಿ ನಿವಾಸಿ ದೇವರಾಜ್​ ಐದು ವರ್ಷಗಳ ಹಿಂದೆ ಮದುವೆಯಾಗಿದ್ದ. ಇದೀಗ ಆತನು ಪತ್ನಿಯ ತಂಗಿ(ನಾದಿನಿ)ಯ ಮೇಲೆ  ಕಣ್ಣಯ ಹಾಕಿದ್ದ. ಅಲ್ಲದೆ ಆರೋಪಿ ತನ್ನನ್ನೇ ಮದುವೆಯಾಗುವಂತೆ ಪೀಡಿಸುತ್ತಿದ್ದ. ಆಕೆ ಭಾವನ ಬೇಡಿಕೆಯನ್ನು ನಿರಾಕರಿಸಿದ್ದಾಳೆ. ಇದರಿಂದ ಕುಪಿತಗೊಂಡ ಭಾವ ದೇವರಾಜ್​, ನಾದಿನಿಯನ್ನು ಹೇಗಾದರೂ ಮಾಡಿ ಮದುವೆ ಮಾಡಿಕೊಳ್ಳಬೇಕೆಂಬ ಹಠದಿಂದ ಕಳೆದ ಶನಿವಾರ ಕೆಲಸ ಮುಗಿಸಿಕೊಂಡು ಮನೆಗೆ ಬರುತ್ತಿದ್ದ ನಾದಿನಿಯನ್ನು ತನ್ನ ಸಹಚರರ ಜೊತೆ ಸೇರಿಕೊಂಡು ಕಾರಿನಲ್ಲಿ ಅಪಹರಿಸಿದ್ದಾನೆ.

ಈ ಕುರಿತು ಕೊಡಿಗೆಹಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ಪೊಲೀಸರು ಆರೋಪಿಗಳನ್ನು ಪತ್ತೆ ಹಚ್ಚಿ ಮೂವರನ್ನು ಬಂಧಿಸಿದ್ದಾರೆ.