ಮಗು ಜನಿಸುವ ಮೊದಲೇ ಪತಿಗೆ ದುಬಾರಿ ಬೆಲೆಯ ಲ್ಯಾಂಬೋರ್ಗಿನಿ ಕಾರು ಗಿಫ್ಟ್ ನೀಡಿದ ಪತ್ನಿ: ಇದಕ್ಕೆ ಕಾರಣವೇನು ಗೊತ್ತೇ

ಕೌಲಾಲಂಪುರ: ಮಲೇಷ್ಯಾದ 19 ವರ್ಷದ ಕಾಸ್ಮೆಟಿಕ್​ ಇನ್ಫ್ಲುಯೆನ್ಸರ್ ತಮ್ಮ ಮೊದಲ ಮಗುವನ್ನು ಬರಮಾಡಿಕೊಳ್ಳುವ ಮೊದಲೇ ಪತಿಗೆ 1,60,000 ಪೌಂಡ್​ (1,59,65,031 ರೂ.) ಬೆಲೆಯ ದುಬಾರಿ ಲ್ಯಾಂಬೋರ್ಗಿನಿ ಹುರಾಕ್ಯಾನ್​ ಇವೊ ಕಾರನ್ನು ಉಡುಗೊರೆಯಾಗಿ ನೀಡಿದ್ದಾರೆ. 

ಗರ್ಭಿಣಿಯಾಗಿರುವ ಅನೆಸ್​ ಅಯುನಿ ಒಸ್ಮಾನ್​ ಕುಟುಂಬದ ಸಂಪ್ರದಾಯದ ಪ್ರಕಾರ ಕೆಲಂಟಾನ್​ನಲ್ಲಿರುವ ತಮ್ಮ ತವರು ಮನೆಗೆ ತೆರಳಬೇಕಾಗಿದೆ. ಅಲ್ಲದೆ ಆಕೆ ಮಗು ಜನಿಸಿದ ಬಳಿಕ 100 ದಿನಗಳ ಕಾಲ ಒಂದೇ ಕೋಣೆಯಲ್ಲಿ ಇರಬೇಕಾಗುತ್ತದೆ. ಮಗು ಜನಿಸಿದ ಬಳಿಕ ಎದುರಾಗುವ ಯಾವುದೇ ತೊಂದರೆಗಳನ್ನು ತಪ್ಪಿಸಿಕೊಳ್ಳಲು ಒಸ್ಮಾನ್​ ಒಂದೇ ಕಡೆ ಇರಬೇಕಾಗಿದೆ. ಈ ಸಮಯದಲ್ಲಿ ಒಸ್ಮಾನ್​ಗೆ ಪತಿಯೇ ಆಧಾರವಾಗುತ್ತಾರೆ.​ 

ಆದ್ದರಿಂದ ಅನೆಸ್​ ಅಯುನಿ ಒಸ್ಮಾನ್​ ರವರು ತನ್ನ ಪತಿ ಹಾಗೂ ಉದ್ಯಮಿ ವೆಲ್ಡಾನ್​ ಜುಲ್ಕೆಫ್ಲಿ (20) ಮೇಲೆ​ ಸಂಪೂರ್ಣ ಅವಲಂಬಿತರಾಗಿರುತ್ತಾರೆ. ಈ ದಿನಗಳಲ್ಲಿ ಅವರಿಗೆ ಪ್ರತಿಯೊಂದು ನೆರವನ್ನು ಪತಿಯೇ ಮಾಡಬೇಕಾಗುತ್ತದೆ. ನ್ಯಾಪ್ಕಿನ್​ ಬದಲಾವಣೆಯಿಂದ ಹಿಡಿದು ಪ್ರತಿಯೊಂದು ಕೆಲಸವನ್ನು ಮಾಡಬೇಕಾಗಿರುವುದರಿಂದ ಪತಿ  ವೆಲ್ಡಾನ್​ ಜುಲ್ಕೆಫ್ಲಿ ನಿದ್ರೆಯಿಲ್ಲದ ರಾತ್ರಿಗಳನ್ನು ಕಳೆಯಬೇಕಾಗುತ್ತದೆ. ಮಗು ಮತ್ತು ತಾಯಿಯ ಸಂಪೂರ್ಣ ಜವಾಬ್ದಾರಿ ವೆಲ್ಡಾನ್ ಮೇಲಿರುತ್ತದೆ. 

ಆದ್ದರಿಂದಲೇ ವೆಲ್ಡಾನ್​ಗೆ ಸರ್ಪ್ರೈಸ್​ ಆಗಿ ಪತ್ನಿ ಒಸ್ಮಾನ್ ಕಾರೊಂದನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಇದರ ಟಿಕ್​ಟಾಕ್​ ವೀಡಿಯೋ ವೈರಲ್​ ಆಗಿದೆ. ಅನಿರೀಕ್ಷಿತ ಉಡುಗೊರೆಯಿಂದ ಸಂತೋಷಗೊಂಡ ವೆಲ್ಡಾನ್​ ತನ್ನ ಪತ್ನಿಯನ್ನು ತಬ್ಬಿ, ಬೇಬಿ ಬಂಪ್​ಗೆ ಮುತ್ತಿಡುತ್ತಿರುವ ದೃಶ್ಯ ಈ ವೀಡಿಯೋದಲ್ಲಿದೆ. ಈ ಟಿಕ್​ಟಾಕ್​ ವೀಡಿಯೋ ಒಂದು ಲಕ್ಷಕ್ಕೂ ಅಧಿಕ ವೀಕ್ಷಣೆಯನ್ನು ಪಡೆದುಕೊಂಡಿದೆ. ವಿಡಿಯೋ ನೋಡಿದವರು  ಕಮೆಂಟ್​ ಮಾಡುತ್ತಿದ್ದು, ಪತಿಯ ಬದಲು ಪೂರ್ಣ ಸಮಯಕ್ಕೆ ನರ್ಸ್​ ಆಯ್ಕೆ ಮಾಡಿಕೊಂಡಿದ್ದರೆ, ಇದಕ್ಕಿಂತ ಅಗ್ಗವಾಗಿರುತ್ತಿತ್ತು ಎಂದು ನೆಟ್ಟಿಗರೊಬ್ಬರು ಕಮೆಂಟ್​ ಮಾಡಿದ್ದಾರೆ. ವೆಲ್ಡಾನ್​ ಬಹಳ ಅದೃಷ್ಟವಂತ ಎಂದು ಇನ್ನೊಬ್ಬ ನೆಟ್ಟಿಗ ಕಮೆಂಟ್​ ಮಾಡಿದ್ದಾರೆ. ಅಂದಹಾಗೆ ಒಸ್ಮಾನ್​ ಅವರು ಮಾರ್ಚ್​ ತಿಂಗಳ ಅಂತ್ಯಕ್ಕೆ ಮಗುವಿನ ಜನ್ಮ ನೀಡಲಿದ್ದಾರೆ.