ಸಾಲ ತೀರಿಸಲು ಹೊಸ ತಂತ್ರ ಹೂಡಿದ ಎನ್ ಆರ್ ಐ ದಂಪತಿ: ಕೇರಳ ಸರಕಾರದಿಂದ ಶಾಕ್

ತಿರುವನಂತಪುರಂ(ಕೇರಳ): ಹೊಸ ತಂತ್ರಗಾರಿಕೆಯ ತಮಗಿರುವ ಸಾಲವನ್ನು ತೀರಿಸಲೆಂದು ಹೊರಟ ಎನ್​ಆರ್​ಐ ದಂಪತಿಗೆ ಕೇರಳ ಸರಕಾರ ಶಾಕ್ ನೀಡಿದೆ. ಅವರು ತಮ್ಮ ಮನೆಯನ್ನು ಲಕ್ಕಿ ಡ್ರಾ ಮೂಲಕ ಮಾರಾಟಕ್ಕಿಟ್ಟಿದ್ದರು. ಆದರೆ, ಇದು ಕಾನೂನುಬಾಹಿರವೆಂದು ಕೇರಳ ಸರಕಾರ ಈ ಪ್ರಕ್ರಿಯೆಯನ್ನು ರದ್ದು ಮಾಡಲು ಆದೇಶಿಸಿದ್ದು, ದಂಪತಿಗೆ ನೋಟಿಸ್​ ಜಾರಿ ಮಾಡಿದೆ.

ತಿರುವನಂತಪುರಂನ ವಟ್ಟಿಯುರ್ಕಾವು ಎಂಬಲ್ಲಿನ ನಿವಾಸಿಗಳಾದ ಅಣ್ಣಾ ಹಾಗೂ ಜೋ ದಂಯ ಮನೆಯನ್ನು ಲಕ್ಕಿ ಡ್ರಾ ಮೂಲಕ ಮಾರಾಟ ಮಾಡಲು ಮುಂದಾಗಿದ್ದರು. ಆದರೆ ಲಾಟರಿ ನಡೆಸುವುದಕ್ಕೆ ಕಾನೂನಿನಲ್ಲಿ ಅವಕಾಶವಿಲ್ಲ. ಅಲ್ಲದೆ, ಲಾಟರಿ ಪದ್ಧತಿ ನಿಷೇಧಿತವಾಗಿದ್ದು, ಇದನ್ನು ಸರ್ಕಾರ ಮಾತ್ರ ನಡೆಸಬಹುದಾಗಿದೆ. ಈ ಹಿನ್ನೆಲೆಯಲ್ಲಿ ಮನೆ ಮಾರಾಟವನ್ನು ನಿಲ್ಲಿಸುವಂತೆ ಎನ್​ಆರ್​ಐ ದಂಪತಿಗೆ ರಾಜ್ಯ ಲಾಟರಿ ಇಲಾಖೆ ನೋಟಿಸ್​ ಜಾರಿ ಮಾಡಿದೆ. 

ವಿದೇಶದಲ್ಲಿ ವೃತ್ತಿಯಲ್ಲಿದ್ದ ದಂಪತಿ ಕೋವಿಡ್​ ಬಳಿಕ ಸ್ವದೇಶಕ್ಕೆ ವಾಪಸ್ ಆಗಿ ಉದ್ಯಮ ನಡೆಸುತ್ತಿದ್ದರು. ಆದರೆ, ಅವರು ನಷ್ಟ ಅನುಭವಿಸಿದ್ದರು. ಪರಿಣಾಮ ಅವರಿಗೆ 34 ಲಕ್ಷ ರೂ. ಸಾಲವಾಗಿತ್ತು. ಇದನ್ನು ತೀರಿಸಲು ತಮ್ಮ 1300 ಚದರಡಿಯ ಮನೆ, 3 ಸೆಂಟ್ಸ್​ ಜಾಗವನ್ನು ಲಕ್ಕಿ ಡ್ರಾ ಮೂಲಕ ಮಾರಾಟಕ್ಕಿಟ್ಟಿದ್ದರು.

ಇದಕ್ಕಾಗಿ 3700 ಕೂಪನ್‌ಗಳನ್ನು ಮಾರಾಟ ಮಾಡಿ, ಇದರಿಂದ 74 ಲಕ್ಷ ರೂ.ಗಳನ್ನು ಸಂಗ್ರಹಿಸುವ ಆಲೋಚನೆ ಅವರದಾಗಿತ್ತು. ಒಂದು ಕೂಪನ್​ಗೆ ತಲಾ 2,000 ರೂ. ನಿಗದಿ ಮಾಡಿ, ಈಗಾಗಲೇ 200 ಕೂಪನ್‌ಗಳನ್ನು ಮಾರಾಟ ಮಾಡಿದ್ದರು. ಆದರೆ ಇದೀಗ ಲಾಟರಿ ಇಲಾಖೆಯ ಸೂಚನೆಯಿಂದಾಗಿ ಮಾರಾಟವನ್ನು ನಿಲ್ಲಿಸಬೇಕಾಗಿದೆ.