ನಗ್ನ ವೀಡಿಯೋ ಚಿತ್ರೀಕರಿಸಿ ಕಾಲೇಜು ವಿದ್ಯಾರ್ಥಿನಿ ಮೇಲೆ 7ಮಂದಿಯಿಂದ 16ತಿಂಗಳ ಕಾಲ ಅತ್ಯಾಚಾರ

ಗುಜರಾತ್: ಇಲ್ಲಿನ ಬನಸ್ಕಾಂತ ಜಿಲ್ಲೆಯ ಕಾಲೇಜು ವಿದ್ಯಾರ್ಥಿನಿಯ ನಗ್ನ ವೀಡಿಯೊ ಇಟ್ಟುಕೊಂಡು ಬ್ಲ್ಯಾಕ್ ಮೇಲ್ ಮಾಡಿ 7ಮಂದಿ ಸರಿಸುಮಾರು 16 ತಿಂಗಳುಗಳ ಕಾಲ ಅತ್ಯಾಚಾರ ಮಾಡಿರುವ ಘಟನೆ ನಡೆದಿದೆ ಎಂದು ಪೊಲೀಸರು ಬುಧವಾರ ತಿಳಿಸಿದ್ದಾರೆ.

20 ವರ್ಷದ ಯುವತಿ 2023ರಲ್ಲಿ ಪಾಲನ್ನುರದ ಕಾಲೇಜಿಗೆ ಬರಲು ಆರಂಭಿಸಿದ್ದಾಳೆ. ಅದಾಗಿ ತಿಂಗಳ ಬಳಿಕ 6 ಆರೋಪಿಗಳಲ್ಲೋರ್ವ ಸಂದರ್ಭವಿಶಾಲ್ ಚೌಧುರಿ ಎಂಬಾತ ಇನ್‌ಸ್ಟಾಗ್ರಾಂನಲ್ಲಿ ಆಕೆಯ ಗೆಳೆತನ ಮಾಡಿಕೊಂಡಿದ್ದಾನೆ. 2023ರ ನವೆಂಬರ್ ನಲ್ಲಿ ಆತ ಹೊಟೇಲ್‌ನಲ್ಲಿ ತನ್ನೊಂದಿಗೆ ಉಪಹಾರ ಸೇವಿಸಲು ಆಗಮಿಸುವಂತೆ ಆಕೆಯನ್ನು ಮನವೊಲಿಸಿದ್ದಾನೆ. ಆದರೆ ಹೊಟೇಲ್‌ಗೆ ಆಗಮಿಸಿದ ಆಕೆಯ ಉಡುಪಿನ ಮೇಲೆ ಆತ ಉದ್ದೇಶಪೂರ್ವಕವಾಗಿ ಆಹಾರ ಚೆಲ್ಲಿದ್ದಾನೆ. ಅದನ್ನು ಸ್ವಚ್ಛಗೊಳಿಸುವ ನೆಪದಲ್ಲಿ ಆಕೆಯನ್ನು ಕೊಠಡಿಗೆ ಕರೆದುಕೊಂಡು ಹೋಗಿದ್ದಾನೆ. ಶೌಚಾಲಯದಲ್ಲಿ ವಿದ್ಯಾರ್ಥಿನಿ ಉಡುಪು ಕಳಚಿದ ಸಂದರ್ಭ ವಿಶಾಲ್ ಚೌಧುರಿ ಒಳ ನುಗ್ಗಿ ಆಕೆಯ ವೀಡಿಯೊ ಮಾಡಿದ್ದಾನೆ.

ಇದನ್ನು ಆಕೆ ವಿರೋಧಿಸಿದಾಗ, ವೀಡಿಯೊವನ್ನು ಬಹಿರಂಗಗೊಳಿಸಲಾಗುವುದು ಹಾಗೂ ಇನ್‌ಸ್ಟಾಗ್ರಾಂನಲ್ಲಿ ಪೋಸ್ಟ್ ಮಾಲಾಗುವುದು ಎಂದು ಬೆದರಿಕೆ ಒಡ್ಡಿದ್ದಾನೆ. ಇದೇ ವೀಡಿಯೊ ತುಣುಕುಗಳನ್ನು ಬಳಸಿ ತನ್ನೊಂದಿಗೆ ಹಾಗೂ ತನ್ನ ಸ್ನೇಹಿತರೊಂದಿಗೆ 2023 ನವೆಂಬ‌ರ್ ಹಾಗೂ 2025 ಫೆಬ್ರವರಿ ನಡುವೆ ವಿವಿಧ ಸ್ಥಳಗಳಲ್ಲಿ, ವಿವಿಧ ಸಂದರ್ಭಗಳಲ್ಲಿ ದೈಹಿಕ ಸಂಬಂಧ ಹೊಂದುವಂತೆ ವಿದ್ಯಾರ್ಥಿನಿಗೆ ಬಲವಂತಪಡಿಸಿದ್ದಾನೆ ಎಂದು ಎಫ್‌ಐಆರ್‌ನಲ್ಲಿ ಹೇಳಲಾಗಿದೆ.

ಯುವತಿ ಪಾಲನ್ನುರ ತಾಲೂಕು ಪೊಲೀಸರನ್ನು ಸಂಪರ್ಕಿಸಿದ ಬಳಿಕ 6 ಮಂದಿ ಹಾಗೂ ಓರ್ವ ಅಪರಿಚಿತನ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ ಸಂಬಂಧಿತ ಸೆಕ್ಷನ್‌ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.‌ ಅಶ್ಲೀಲ ವೀಡಿಯೊಗಳನ್ನು ಎಲೆಕ್ಟ್ರಾನಿಕ್ಸ್ ರೂಪದಲ್ಲಿ ಪ್ರಕಟಿಸಿದ ಅಥವಾ ಪ್ರಸಾರ ಮಾಡಿದ ಆರೋಪದಲ್ಲಿ ಮಾಹಿತಿ ತಂತ್ರಜ್ಞಾನ ಕಾಯ್ದೆ ಸೆಕ್ಷನ್ 67ರ ಅಡಿಯಲ್ಲಿ ಕೂಡ ಆರೋಪಿ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.

ಆರೋಪಿಗಳನ್ನು ಬಂಧಿಸಲು ಕಾರ್ಯಾಚರಣೆ ನಡೆಯುತ್ತಿದೆ ಎಂದು ಪಾಲನ್ನುರ ತಾಲೂಕು ಪೊಲೀಸ್ ಠಾಣೆಯ ಅಧಿಕಾರಿ ತಿಳಿಸಿದ್ದಾರೆ.