ಬಾಲಿವುಡ್ ಕಾಸ್ಟ್ ಕೌಚಿಂಗ್, ಸೀಕ್ರೆಟ್ ವಾಟ್ಸ್‌ಆ್ಯಪ್ ಗ್ರೂಪ್ ಕರಾಳತೆ ಬಿಚ್ಚಿಟ್ಟ ಸ್ಯಾಂಡಲ್‌ವುಡ್ ನಟಿ ಎರಿಕಾ ಫೆರ್ನಾಂಡೀಸ್

ಎರಿಕಾ ಫೆರ್ನಾಂಡೀಸ್ ಅಂದರೆ ಕನ್ನಡ ಸಿನಿಮಾ ಅಭಿಮಾನಿಗಳಿಗೆ ಚಿರಪರಿಚಿತ ಮುಖ. ನಿನ್ನಿಂದಲೇ, ಬುಗುರಿ ಸಿನಿಮಾಗಳಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡ ಎರಿಕಾ ಫರ್ನಾಂಡೀಸ್ ತಮಿಳು ಹಾಗೂ ತೆಲುಗು ಸಿನಿಮಾಗಳಲ್ಲಿಯೂ ಕಾಣಿಸಿಕೊಂಡಿದ್ದಾರೆ. ಅಲ್ಲದೆ ಹಿಂದಿ ಸೀರಿಯಲ್ ಸೇರಿದಂತೆ ಟೆಲಿವಿಶನ್‌ಗಳಲ್ಲೂ ಮಿಂಚಿದ್ದಾರೆ. ಈ  ನಡುವೆ ಬಾಲಿವುಡ್‌ನಿಂದ ಆಫರ್ ಬಂದಿದ್ದರಿಂದ ಅಲ್ಲಿ ಕೆಲಸ ಆರಂಭಿಸಿದ ಎರಿಕಾ ಫೆರ್ನಾಂಡಿಸ್ ದಿಢೀರ್ ಬ್ರೇಕ್ ಪಡೆದು ಕುಟುಂಬದೊಂದಿಗೆ ಕಾಲ ಕಳೆಯುತ್ತಿದ್ದಾರೆ. ಇದೀಗ ಎರಿಕಾ ಅವರು ಈ ಬ್ರೇಕ್ ಹಿಂದಿನ ಕಾರಣವನ್ನೂ ಬಹಿರಂಗಪಡಿಸಿದ್ದಾರೆ.

ಎರಿಕಾ ಫೆರ್ನಾಂಡಿಸ್ ಬಾಲಿವುಡ್‌ನಲ್ಲಿ ನಡೆಯುತ್ತಿರುವ ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿದ್ದಾರೆ. ಪರದೆ ಮುಂದೆ ಎಲ್ಲರೂ ಉತ್ತಮವಾಗಿದ್ದರೂ ಪರದೆ ಹಿಂದೆ ಅವರ ಅಸಲಿ ಮುಖ ಬಯಲಾಗುತ್ತದೆ. ನಟಿಯರನ್ನು ಬಾಲಿವುಡ್ ಯಾವ ರೀತಿ ಬಳಸಿಕೊಳ್ಳುತ್ತಿದೆ ಅನ್ನುವ ಕುರಿತು ಅವರು ಹೇಳಿದ್ದಾರೆ. ಇದೇ ವೇಳೆ ಬಾಲಿವುಡ್‌ನ ಸೀಕ್ರೆಟ್ ವ್ಯಾಟ್ಸ್‌ಆ್ಯಪ್ ಗ್ರೂಪ್ ಕುರಿತು ಹೇಳಿದ್ದಾರೆ.

ಬಾಲಿವುಡ್‌ನ ಕರಾಳತೆಯಿಂದ ಬೇಸತ್ತ ಎರಿಕಾ ಇದೀಗ ನಟನೆಯಿಂದ ದೂರ ಉಳಿದಿದ್ದಾರೆ. ಇತ್ತೀಚೆಗೆ ಪಾಡ್ ಕಾಸ್ಟ್‌ವೊಂದರಲ್ಲಿ ಏರಿಕಾ ಈ ರಹಸ್ಯಗಳನ್ನು ಹೇಳಿದ್ದಾರೆ. ಬಾಲಿವುಡ್ ಹೊರಗಿನಿಂದ ಹೊಳೆಯುವ ರೀತಿಯಂತೆ ಒಳಗೆ ಇಲ್ಲ. ಗ್ಲಾಮರ್, ಫನ್, ಫೇಮ್ ಎಂದೆಲ್ಲಾ ಹೊರಗಿನಿಂದ ಕಾಣುತ್ತೆ. ಆದರೆ ಒಳಗೆ ಇರುವಷ್ಟು ಹುಳುಕು ಮತ್ಯಾವ ಕ್ಷೇತ್ರದಲ್ಲೂ ಇರವುದಿಲ್ಲ ಎಂದಿದ್ದಾರೆ.

ಬಾಲಿವುಡ್‌ನಲ್ಲಿ ಕೆಲವೇ ಕೆಲವು ಮಂದಿ ಉತ್ತಮರಿದ್ದಾರೆ. ಇನ್ನುಳಿದವರು ಪರದೆ ಮುಂದೆ ಉತ್ತಮರಾಗಿ ಕಾಣಿಸುತ್ತಾರೆ. ಆದರೆ ಅವರ ನಿಜ ರೂಪ ಗೊತ್ತಾದರೆ ನೀವು ಒಂದು ಸಿನಿಮಾ ನೋಡುವುದಿಲ್ಲ ಎಂದಿದ್ದಾರೆ. ಕಾಸ್ಟಿಂಗ್ ಕೌಚ್ ಕುರಿತು ಹೇಳಿದ ನಟಿ, ನನಗೆ ಕೆಲ ಅವಕಾಶಗಳು ಬಂದಿತ್ತು. ಪಾತ್ರ, ಅದಕ್ಕೆ ತಯಾರಿ ಸೇರಿದಂತೆ ಕೆಲ ಮಾತುಗಳು ನಡೆದ ಬಳಿಕ ಕೊನೆಯ ಹಂತದಲ್ಲಿ ಇದರ ಬೇಡಿಕೆಗಳೇ ಹೆಚ್ಚಾಗುತ್ತಿತ್ತು. ರಾತ್ರಿಯ ಕೆಲಸ, ಅವಶ್ಯಕತೆ, ಮಂಚ ಹಂಚಿಕೊಳ್ಳುವ ಅನಿವಾರ್ಯತೆ ಕುರಿತು ಹೇಳಲಾಗುತ್ತೆ. ಇವನ್ನು ನಿರಾಕರಿಸಿದ ಕಾರಣ ಬಾಲಿವುಡ್‌ನಲ್ಲಿ ಅವಕಾಶ ಸಿಗಲಿಲ್ಲ ಎಂದು ಎರಿಕಾ ಫರ್ನಾಂಡಿಸ್ ಹೇಳಿದ್ದಾರೆ.

ಹಾಗಂತ ಎಲ್ಲರೂ ಹಾಗಲ್ಲ. ಯಾವುದೇ ಬೆಂಬಲವಿಲ್ಲದೆ, ಗಾಡ್‌ಫಾಧರ್ ಅಥವಾ ರೆಫರೆನ್ಸ್ ಇಲ್ಲದೆ ಬಾಲಿವುಡ್‌ನಲ್ಲಿ ಪ್ರತಿಭೆ ಒಂದರಿಂದಲೇ ಮಿಂಚಲು ಅಸಾಧ್ಯ ಎನ್ನುವಂತಾಗಿದೆ. ಇದಕ್ಕಾಗಿ ಕೆಲ ಸೀಕ್ರೆಟ್ ವ್ಯಾಟ್ಸಾಪ್ ಗ್ರೂಪ್‌ಗಳಿದೆ. ಇಲ್ಲಿ ಈ ರೀತಿಯ ವಿಷಗಳೇ ಚರ್ಚೆ. ಅವರ ಬೇಡಿಕೆ ಒಪ್ಪಿಕೊಂಡರೆ ಪ್ರತಿಭೆ ಇಲ್ಲದಿದ್ದರೂ ಅವಕಾಶಗಳ ಮೇಲೆ ಅವಕಾಶಗಳು ಸಿಗುತ್ತದೆ ಎಂದಿದ್ದಾರೆ.

ಏರಿಕಾ ಫೆರ್ನಾಂಡಿಸ್ ಸದ್ಯ ನಟನೆಯಿಂದ ದೂರ ಉಳಿದಿದ್ದಾರೆ. ಅದರಲ್ಲೂ ಬಾಲಿವುಡ್ ಸಹವಾಸವೇ ಬೇಡ ಎನ್ನುತ್ತಿದ್ದಾರೆ. ಸದ್ಯ ಎರಿಕಾ ಫೆರ್ನಾಂಡಿಸ್ ದುಬೈನಲ್ಲಿದ್ದಾರೆ. ಆದರೆ ಸೋಶಿಯಲ್ ಮೀಡಿಯಾ ಮೂಲಕ ಅಭಿಮಾನಿಗಳ ಜೊತೆ ಸಂಪರ್ಕದಲ್ಲಿದ್ದಾರೆ.