“Thanks a lot for ur love and support throughout.from 1929 hrs consider me as Retired.”
ಮಹೇಂದ್ರ ಸಿಂಗ್ ಧೋನಿ ಅವರನ್ನು ಹತ್ತಿರದಿಂದ ಕಂಡ ಎಲ್ಲರೂ ನಿರೀಕ್ಷಿಸಿದಂತೆಯೇ ಆಯಿತು!
’ಕ್ಯಾಪ್ಟನ್ ಕೂಲ್’ ತಣ್ಣಗೆ ಇನ್ಸ್ಟಾಗ್ರಾಂನಲ್ಲಿ ’ಅಂತರ್ ರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಘೋಷಿಸಿ ಬಿಟ್ಟಿದ್ದಾರೆ.
ಯಾವುದೇ ಕೊನೆಯ ಪಂದ್ಯವಿಲ್ಲ! ಯಾವುದೇ ಭಾಷಣ ಇಲ್ಲ! ಯಾರೂ ಹೆಗಲ ಮೇಲೆ ಹೊತ್ತೊಯ್ಯಬೇಕಾಗಿಲ್ಲ… ಕ್ರೀಡಾಂಗಣದ ಸುತ್ತ ವಿಕ್ಟರಿ ಲ್ಯಾಪ್ ಇಲ್ಲ… ಎಲ್ಲವೂ ತಣ್ಣಗೆ… ಎಲ್ಲವೂ ’ಮಹಿಮಾಯೆ’ಯಂತೆಯೇ…
ಹದಿನಾರು ವರ್ಷಗಳ ಹಿಂದೆ, ಹೀಗೆಯೇ ತಣ್ಣಗೆ ಭಾರತೀಯ ಕ್ರಿಕೆಟ್ ಲೋಕದಲ್ಲಿ ಪ್ರತ್ಯಕ್ಷವಾಗಿ, ಧುತ್ತೆಂದು ಬೆಳೆದು ನಿಂತ ಉದ್ದ ಕೂದಲಿನ ತಣ್ಣನೇ ಮನಸ್ಸಿನ ರಾಂಚಿಯ ಆ ಯುವಕ ಅಂತರ್ ರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ದಂತಕಥೆಯಾಗಿ ನಿವೃತ್ತರಾಗುತ್ತಾರೆ ಎಂದು ಯಾರೂ ಕನಸು ಕಂಡಿರಲಿಲ್ಲ. ಅದೂ ಒಬ್ಬ ವಿಕೆಟ್-ಕೀಪರ್ ಬ್ಯಾಟ್ಸಮನ್ ಭಾರತ ತಂಡದ ನಾಯಕನಾಗಿ ಭಾರತಕ್ಕೆ ಎರಡನೇ ಬಾರಿಗೆ ವಿಶ್ವಕಪ್ ತಂದು ಕೊಡುತ್ತಾರೆ ಎಂದು ಯಾರೂ ಎಂದುಕೊಂಡಿರಲಿಲ್ಲ. ವಿಶ್ವ ಕ್ರಿಕೆಟ್ ನಲ್ಲಿ ಮೂರು ಐಸಿಸಿ ಟ್ರೋಫಿಯನ್ನು ಗೆದ್ದ ಹೆಗ್ಗಳಿಕೆ ಧೋನಿ ಅವರದ್ದು. ಅದು ಇಂದೂ ಜಾಗತಿಕ ದಾಖಲೆ.
ಎಲ್ಲಕ್ಕಿಂತ ಮುಖ್ಯವಾಗಿ ಎಷ್ಟೆತ್ತರಕ್ಕೆ ಏರಿದರೂ, ಬೇರುಗಳನ್ನು ಭೂಮಿಯೊಳಗೆ ಗಟ್ಟಿಯಾಗಿ ಊರಿ ಬದುಕು ಸಾಗಿಸಿದ ’ಅಪ್ಪಟ ಮನುಷ್ಯ’ ಧೋನಿ. ಆ ವ್ಯಕ್ತಿತ್ವದಲ್ಲಿ ಅಹಂಕಾರದ ಒಂದು ಚಿಟಿಕೆ ಇರಲಿಲ್ಲ. ಹಮ್ಮು-ಬಿಮ್ಮುಗಳು ಇರಲಿಲ್ಲ. ತಾನೊಬ್ಬ ಮಹಾನ್ ಸಾಧನೆ ಮಾಡಿದ ಜಾಗತಿಕ ಕ್ರಿಕೆಟ್ ದಂತಕಥೆ ಎಂಬ ಅಹಂ ಇರಲಿಲ್ಲ. ಸದಾ ಮಗುವಿನ ಮನಸ್ಸು, ನಗು ತುಂಬಿದ ಮುಖ!
ಆ ದಿನ ಈಗಲೂ ನೆನಪಿದೆ!
೨೦೦೮ರ ಅಕ್ಟೋಬರ್ ೬ ಅಥವಾ ೭. ಭಾರತ-ಆಸ್ಟ್ರೇಲಿಯ ನಡುವೆ ಬೆಂಗಳೂರಿನಲ್ಲಿ ಆರಂಭವಾಗಬೇಕಿದ್ದ ಮೊದಲ ಕ್ರಿಕೆಟ್ ಟೆಸ್ಟ್ ಮುನ್ನಾ ಅಥವಾ ಅದಕ್ಕಿಂದ ಮೊದಲ ದಿನ. ಚಿನ್ನಸ್ವಾಮಿ ಕ್ರೀಡಾಂಗಣದ ಡ್ರೆಸ್ಸಿಂಗ್ ರೂಮ್ ಮುಂಭಾಗದಲ್ಲಿ ನಾನು ರಾಹುಲ್ ದ್ರಾವಿಡ್ ಗಾಗಿ ಕಾದು ಕೂತಿದ್ದೆ. ಅಲ್ಲಿ ಯಾರೂ ಇರಲಿಲ್ಲ.
ಕೈಯಲ್ಲಿ ಬ್ಯಾಡ್ಮಿಂಟನ್ ಬ್ಯಾಟ್ ಹಿಡಿದು ಡ್ರೆಸ್ಸಿಂಗ್ ರೂಂನಿಂದ ಹೊರಬಂದ ಧೋನಿ ಎದುರಿಗೆ ಬಂದು ನಿಂತು, “ಇಲ್ಲಿ ಬ್ಯಾಡ್ಮಿಂಟನ್ ಕೋರ್ಟ್‌ಗೆ ಹೋಗುವ ದಾರಿ ನಿಮಗೆ ಗೊತ್ತಾ” ಎಂದು ಕೇಳಿ “ಯಾರಿಗಾಗಿ ಕಾಯುತ್ತಿದ್ದೀರಿ” ಎಂದು ಕೇಳಿದರು. “ರಾಹುಲ್ ಗಾಗಿ” ಎಂದೇ. ಮಾತು ಮುಂದುವರಿಸಿದ ಧೋನಿ ಸುಮಾರು ಅರ್ಧ ಗಂಟೆ ಕಾಲ ಕನ್ನಡ ಪತ್ರಿಕೋದ್ಯಮ ಮತ್ತು ಮಾಧ್ಯಮದ ಬಗ್ಗೆ ನನ್ನ ಬಳಿ ಪ್ರಶ್ನೆಯ ಮೇಲೆ, ಪ್ರಶ್ನೆ ಕೇಳಿ ಉತ್ತರ ಪಡೆದು ಕೊಂಡಿದ್ದರು. ಆನಂತರ ಅವರೆಂದೂ ನನ್ನ ಮುಖ ಮರೆತಿರಲಿಲ್ಲ. ನಾನು ಕ್ರಿಕೆಟ್ ವರದಿಗಾರನಾಗಿ ಇದ್ದಷ್ಟು ದಿನ ಎದುರು ಸಿಕ್ಕಾಗಲೆಲ್ಲಾ “ಹೇಗಿದ್ದೀರಾ?” ಎಂದು ಆತ್ಮೀಯವಾಗಿ ಕೇಳುತ್ತಿದ್ದ ಧೋನಿ ಅವರನ್ನು ನಾನು ಹತ್ತಿರದಿಂದ ಕಂಡ ಪರಿಣಾಮ, ಆ ಮನುಷ್ಯ ಎಷ್ಟು ’ಅಪ್ಪಟ ಮನುಷ್ಯ’ ಎಂದು ಅರಿವಾಗಿತ್ತು.
ಆಸ್ಟ್ರೇಲಿಯ ವಿರುದ್ಧದ ಆ ಸರಣಿ ಹಲವು ಕಾರಣಗಳಿಂದ ಮುಖ್ಯವಾಗಿತ್ತು. ಮೊಹಾಲಿಯಲ್ಲಿ ನಡೆದ ಎರಡನೇ ಟೆಸ್ಟ್ ನಲ್ಲಿ ಸಚಿನ್ ತೆಂಡೂಲ್ಕರ್ ೧೨೦೦೦ ಟೆಸ್ಟ್ ರನ್ ಗಳ ಬ್ರಯಾನ್ ಲಾರಾ ವಿಶ್ವ ದಾಖಲೆ ಮುರಿದಿದ್ದರು. ದೆಹಲಿಯಲ್ಲಿ ನಡೆದ ಮೂರನೇ ಟೆಸ್ಟ್ ನಲ್ಲಿ ಭಾರತ ತಂಡದ ನಾಯಕರಾಗಿದ್ದ ಅನಿಲ್ ಕುಂಬ್ಳೆ ಇದ್ದಕ್ಕಿದ್ದಂತೆ ನಾಯಕತ್ವ ತ್ಯಜಿಸಿ ಟೆಸ್ಟ್ ಕ್ರಿಕೆಟ್ ಗೆ ವಿದಾಯ ಹೇಳಿದ್ದರು. ದಢಕ್ಕೆಂದು ಭಾರತ ಟೆಸ್ಟ್ ತಂಡದ ನಾಯಕತ್ವ ಧೋನಿ ಹೆಗಲ ಮೇಲೇರಿ ಕೂತಿತ್ತು.
ವಿರೇಂದ್ರ ಸೆಹ್ವಾಗ್, ಸಚಿನ್ ತೆಂಡೂಲ್ಕರ್, ರಾಹುಲ್ ದ್ರಾವಿಡ್, ವಿ.ವಿ.ಎಸ್. ಲಕ್ಷ್ಮಣ್, ಸೌರವ್ ಗಂಗೂಲಿ ಅವರಂತಹ ಘಟಾನುಘಟಿಗಳನ್ನು ಧೋನಿ ’ಮ್ಯಾನೇಜ್’ ಮಾಡಬೇಕಿತ್ತು. ಅದು ಅಷ್ಟು ಸುಲಭದ ಮಾತಾಗಿರಲಿಲ್ಲ.
ಅದೇ ಸರಣಿಯ ಕೊನೆಯಲ್ಲಿ ನಾಗ್ಪುರ ಟೆಸ್ಟ್ ನಲ್ಲಿ ಸೌರವ್ ಗಂಗೂಲಿ ನಿವೃತ್ತರಾದರು. ಆ ಟೆಸ್ಟ್ ನಡೆಯುತ್ತಿದ್ದ ವೇಳೆ, ಭಾರತ ತಂಡದ ಕ್ಯಾಪ್ಟನ್ ಆಗಿದ್ದ ಧೋನಿ ’ದಾದಾ’ ಅವರನ್ನು ನಡೆಸಿಕೊಂಡ ರೀತಿ ಅವರ ಸರಳ ಮನೋಭಾವದ ಪ್ರತೀಕವಾಗಿತ್ತು.
ಸುಮಾರು ಒಂಬತ್ತು ವರ್ಷಗಳ ಕಾಲ ಭಾರತದ ಏಕದಿನ ತಂಡ, ಆರು ವರ್ಷಗಳ ಕಾಲ ಟೆಸ್ಟ್ ತಂಡವನ್ನು ಧೋನಿ ನಡೆಸಿದ ರೀತಿ ಅದ್ಭುತವಾದದ್ದು. ನನ್ನ ಪ್ರಕಾರ ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಮಹೇಂದ್ರ ಸಿಂಗ್ ಧೋನಿ ಅತ್ಯಂತ ಯಶಸ್ವಿ ನಾಯಕ. ಕೇವಲ ಗೆದ್ದ ಸರಣಿಗಳು ಮತ್ತು ಪಂದ್ಯಗಳ ದೃಷ್ಟಿಯಿಂದ ಮಾತ್ರವಲ್ಲ. ಒಟ್ಟಾರೆ ಘಟಾನುಘಟಿಗಳ ನಿರ್ಗಮನದ ನಂತರ ಭಾರತ ಕ್ರಿಕೆಟ್ ಗೆ ಮರುಜೀವ ನೀಡಿ, ತಂಡವನ್ನು ಗಟ್ಟಿಯಾಗಿ ಕಟ್ಟಿದ ಕೀರ್ತಿ ಧೋನಿಗೆ ಸಲ್ಲಬೇಕು. ಆ ಕಾರಣದಿಂದಲೇ ಧೋನಿ ಭಾರತ ಕ್ರಿಕೆಟ್ ಕಂಡ ಶ್ರೇಷ್ಠ ನಾಯಕ ಎಂಬ ತೀರ್ಮಾನ ನನ್ನದು.
ಇನ್ನು ಧೋನಿ ನೆನಪಿಟ್ಟುಕೊಳ್ಳಲು…. ವಾಂಖೆಡೆಯಲ್ಲಿ ನಡೆದ ವಿಶ್ವಕಪ್ ಫೈನಲ್ ನ ಆ ಒಂದು ಸಿಕ್ಸರ್ ಸಾಕು. ನೆನಪಿರಲಿ ’ಕ್ರಿಕೆಟ್ ದೇವರು’ ಕೂಡ ವಿಶ್ವಕಪ್ ಮುಟ್ಟಿದ್ದು ಧೋನಿ ನಾಯಕತ್ವದಲ್ಲಿ!
Sachin Tendulkar
@sachin_rt
Your contribution to Indian cricket has been immense, @msdhoni. Winning the 2011 World Cup together has been the best moment of my life. Wishing you and your family all the very best for your 2nd innings.
“ಮಹಿ ಭಾಯ್ ಗುಡ್ ಲಕ್. ನಿಮಗೆ ಮತ್ತು ನಿಮ್ಮ ಕುಟುಂಬಕ್ಕೆ ಶುಭವಾಗಲಿ.”
ನಮ್ಮ ವಾಟ್ಸ್ ಆಪ್ ಬಳಗಕ್ಕೆ ನಿಮಗೆ ಸ್ವಾಗತ: https://chat.whatsapp.com/EZkL0qySgGXEtHyGclY75E
ಪ್ರತಿಕ್ಷಣದ ಸುದ್ದಿಗಾಗಿ ನಮ್ಮ FB Page Like ಮಾಡಿ… https://www.facebook.com/Emungaru-123687244977933
